政壇：拋錯書包讀錯字 梁繼昌出醜
話時話，立法會議員不時會喺發言時「拋書包」引經據典，好似尋日續會，會計界議員梁繼昌就喺辯論時講起「政治politics」嘅根源，點知拋錯書包，鬧出笑話，要主席曾鈺成開口指正。
梁繼昌
梁繼昌指「政治」英文「politics」，源自希「獵」字「poly」，意思係「好多人」，亦引證孫中山所講「政治乃眾人之事」，政治係決策過程，為眾人或社區搵一個可以接受嘅決定。佢發言後，議員陳偉業就要求主席點算法定人數，令會議暫停。
曾鈺成就趁空檔指正梁繼昌，話「politics」來源應該係希臘文「polis」，意指「城市」，「polus」先係解多嘅意思。佢又糾正Kenneth「希臘」嘅讀音「係臘肉個臘唔係獵人個獵」，中英皆錯嘅梁繼昌只能以笑遮醜。梁繼昌其後喺Facebook回應事件，認為討論好有意思，多謝主席意見，會虛心接受，但強調網上文獻仍有唔同嘅解讀。
