政壇：搞搞政：議員輸區選 民調揭玄機

建仔嘅梁志祥同新界東嘅EQ葛珮帆均評分下跌，並喺所屬選區之中排尾二，梁更大跌零點三六分至二點一四分，幾乎係所有直選立會議員之中評分最低，難怪佢喺元朗天耀選區只以一百六十一票之微，險勝首次參選嘅對手。不過，EQ就守唔住所屬嘅沙田頌安選區大本營，敗給首次參選嘅工黨葉榮。

評分下跌固然輸得轟烈，但唔係評分回升就可避得過被叮走嘅命運，好似大熱倒灶嘅建仔鍾樹根，原來佢喺港島區嘅評分排榜尾，僅得二點二五分，評分低過同樣區選落敗嘅公文袋黨陳家洛，反映支持度下跌唔係一朝一夕嘅事。至於無緣連任嘅白鴿黨「AV仁」何俊仁，亦係五個超級區議員之中評分最差，輸二百幾票並唔意外。

同樣評分逆市上升嘅民協KK馮檢基，明明評分微升零點零二分，兼喺五個超級區議員評分之中排行第二，但都敗給首次出戰嘅工聯會「小花」陳穎欣。有分析指出，唯一解釋係KK被昔日愛徒黃仲棋「挑機」界刂走二百幾票，呢啲「意外」真係估唔到。但評分低確係反映市民對議員嘅不滿，至於有乜不滿，相信落選議員心中有數。