政壇：梁美芬怒斥畏妻潮文
雖然區議會選舉已經結束，但餘波未了。其中一個焦點係「青年新政」嘅游蕙禎喺九龍城黃埔東選區挑戰現任區議員兼立法會議員梁美芬，游蕙禎最後落選，但人氣仍然高企，有人更加為佢寫咗篇潮文，話有女性因呷醋而唔畀丈夫投票予游蕙禎，而丈夫為咗「女神」游蕙禎決定背叛太太。曾被網民批評外貌嘅梁美芬尋日就呢啲潮文作出連番反擊。
喺選舉結束後，博客文章《因為游蕙禎，我背叛了太太》火速被網民瘋傳。文章內容大約係話，丈夫希望投票畀游蕙禎，但因為太太小氣同嫉妒游嘅美貌，出言制止，丈夫為咗頭家，惟有扮作順從太太嘅決定，其實偷偷地支持咗游。梁美芬今次火力全開，先後喺報章同電台發炮點名批評文章作者，話文章嘲笑投票畀佢嘅男選民都係怕老婆、女選民就係妒忌同小氣，咁講都係唔公道。佢又話黃埔選民都係專業人士，唔係美色可以收買，而外界將選舉當成選美，係侮辱女性候選人同選民。
自認有太太緣
不過，梁美芬承認自己「太太緣」比較好，有好多女性選民叫佢要努力，又指游蕙禎用選美方式選區會，但只可以獲得「覺得你靚嘅人支持」，佢覺得自己夠穩重先可以獲居民信任。佢多次呼籲網民尊重選舉結果，停止抹黑攻擊。
其實梁美芬同游蕙禎嘅戰爭，早喺游宣布參選已經開始，當時梁美芬批游「憑空講、無經驗」，游亦有在Facebook隔空回應。雖然游蕙禎落選，但佢講到明四年之後會喺原區再戰，呢場「女人嘅戰爭」相信只係開端。
