輪椅歌女陷香江 遲早淪為乞丐港
上世紀三十年代，「金嗓子」周璇一曲《天涯歌女》唱到街知巷聞，紅遍全國。估唔到今時今日嘅香港，話就話係國際都會，但一樣有唔少天涯歌女，而且仲係坐輪椅嗰種，講起都令人唏噓。
係咁嘅，近年油尖旺等旅遊旺區出現唔少「輪椅歌女」，佢哋多數來自內地，由殘障男助手陪同，穿梭游走於各區獻唱懷舊金曲，表面上係賣藝，實際上係利用港人及遊客嘅同情心博取施捨，即係變相行乞咁解。唔好睇小呢啲輪椅歌女吖，繁忙時間每小時閒閒地有三百蚊進帳，恨死唔少身體健全嘅打工仔o架。
即係咁，如果輪椅歌女自己賣藝搵食，都值得同情嘅，問題係佢哋多數由丐幫集團控制，以包食宿方式安排來港，再按日薪或拆帳形式攤分所得，而且定期換血，咁就唔係賣藝咁簡單喇。
呢嗱，本報記者直擊油麻地一個「殘丐集中營」，發現門外有閉路電視監控，唔少殘丐出出入入，到各區搵食，仲有一名操普通話嘅中年男士全程監控，指揮輪椅歌女幾時「登台」，幾時收工，直情好似娛樂圈經理人咁，證明殘丐行乞制度化，背後唔知有幾多污糟交易及罪惡勾當。
話時話，內地殘丐職業化，而且受到不法集團控制，早就唔係新聞，估唔到喺一國兩制之下，香港亦被丐幫集團攻陷，搞到烏煙瘴氣，都咪話唔大鑊。正如有人話齋，殘疾乞丐盤據旅遊區搵食，唔止為市民及遊客造成不便，而且損害本港旅遊業形象，外國人唔知底細，仲以為香港政府刻薄，唔肯照顧殘疾人士添。
所以話，亂象皆因官僚起。殘丐問題愈來愈嚴重，市民怨聲載道，有區議員經常收到投訴，轉而向警方及社署等政府部門反映，點知各個部門唔係互相推卸，就係闊佬懶理。其實，呢啲殘丐分明違反本港逗留條件，甚至可能涉及人口拐賣及行騙等不法勾當，執法部門只要順藤摸瓜，就可以輕易將不法集團連根拔起，當局連咁簡單嘅事都唔肯做，中門大開不特止，而且對殘丐行乞亂象隻眼開隻眼閉，簡直係靠害。
最好笑嘅係，港產官僚成日自吹自擂，甚至以「紐倫港」自詡，可惜眼高手低，一事無成。有眼你睇，家陣香港烏煙瘴氣，七國咁亂，除咗成為「假難民港」，而且隨時淪為「乞丐港」添，叮！
