城中鏡：慳錢「惠」婦孺
為幫助受家暴影響嘅女性，一班熱心名人早喺五年前成立心蓮心慈善組織，協助受家暴困擾嘅女性自力更生，早前佢哋舉行籌款晚宴，心蓮心行政委員會成員Shirley管洪雪玲話，心蓮心成立五年仲未有會址，但為減少組織開支，依家都未有搵地方嘅打算。
管洪雪玲每三個月就落區探訪受助家庭。
何彭慧嫻（左）同心蓮心行政委員會成員Mahnaz Lee，攜手協助受家暴困擾嘅弱勢婦女。
陳慕婷（中）依家專注幫老公陳正欣（左）打理生意，但不忘支持心蓮心工作。右為保良局前主席梁寶珠。
陳慕婷樂做賢內助
心蓮心創辦人Patti何彭慧嫻就話，家暴問題主要出現喺新移民、低收入家庭。Patti見過有婦女畀丈夫打到骨折、甚至耳聾，仲發現好多婦女都唔識求助，又怕報警會令到丈夫入獄，寧願吞聲忍氣三十年咁耐！
Patti又話，香港地有唔少家暴個案，呢啲暴力行為絕唔能夠容忍，所以心蓮心特別關注呢班弱勢婦女，五年嚟已幫助過逾四萬名婦女。Shirley依家每三個月就會落區探訪，佢話每次見到班婦女大膽求助，都會好感動。見到受助家庭小朋友嘅畫作，由黑白變做色彩繽紛、由子女同父親疏離到手拖手，更鼓勵佢繼續幫人，覺得工作極具意義。
同場仲有保良局總理陳正欣同太太Angel陳慕婷，Angel曾加入心蓮心幫手籌款，但依家忙於幫助丈夫工作而分身不暇，謙稱自己不如新世紀女性，未能家庭事業兩兼顧。Angel仲借心蓮心英文名Women Helping Women，取笑自己目前喺Women Helping Men喎，認真識講笑。同樣支持活動嘅霍麗萍就大讚香港女性能幹，能夠兼顧家庭同事業。
