政壇：滙豐阿姐2020撐半邊天
女性喺職場嘅角色愈嚟愈重要，滙豐都話，二○二○年佢哋嘅一半高層要係女性！睇番滙豐香港近年嘅「一姐」真係唔少，譬如馮婉眉、李慧敏、梁高美懿同薛關燕萍等；依家就有滙豐大中華區行政總裁黃碧娟，同埋新鮮滾熱辣嘅滙豐香港區一姐施穎茵咁。
滙豐香港現時的高管中，包括新鮮滾熱辣嘅施穎茵。（資料圖片）
英國滙豐話五年後女性高管比例要大增，呢個措施比業內好多機構都前衞，事關依家好多大銀行一般都只係得五分之一高管係女性。而今次英國滙豐仲唔係得個講字，佢哋會聯絡番啲以前因為要照顧小朋友而離職嘅女高管，睇睇佢哋有冇興趣回歸，英國滙豐仲會喺招聘時，試行以不顯示性別方式嚟審閱應徵者履歷，以排除任何不自覺嘅偏見。
唔講唔知，英國滙豐本身幾個大部門都由女性領軍，其中一位麥倩華（Francesca McDonagh），佢之前係滙豐香港個人理財業務嘅阿頭，後尾調咗去中東嗰邊，依家佢係英國滙豐零售銀行及財富管理阿頭。
