政壇：旅議會票后老臣子先「董」

旅遊業議會（旅議會）前日舉行周年大會，改選四名業界理事，當選者包括瓦努阿圖國家旅遊公司董事總經理鄧雯蕙，事後鄧雯蕙本人自稱係首次有女士出來參選並當選理事，旅議會主席胡兆英則對於係咪首次有女性當選理事支吾以對，莫非胡兆英喺旅議會服務多時都矇查查，答唔到旅議會有無出現過女理事？

胡兆英疑對旅議會歷史「半桶水」，最終要由旅議會老臣子、上月再度續任總幹事嘅董耀中出手解畫。董耀中憶述，首名直選女理事的誕生，係○二年當選嘅東和旅遊董事兼總經理徐王美倫，當年佢嘅得票成為票后，仲一度係旅議會副主席，直至去年才卸任。

對於徐王美倫係咪先係首名直選女理事，胡兆英接受查詢時疑想息事寧人，表示不論啱唔啱都無所謂，而且好小事，強調董耀中比較清楚理事選舉嘅年份同資料喎。