政壇：星星鬼拍後尾枕 噏兩電加價
每年年底大家都會非常關注兩電來年電費加幅，同「大嘥鬼」有幾分相似嘅環境局局長「星星」黃錦星尋日出席電台節目時話，顧問參考多個國家狀況後，建議將兩電准許回報由目前百分之九點九九，下調至百分之六至八，而決定准許回報率時要考慮環球息口，要平衡發電環保同穩定性。
黃錦星表示，顧問參考多個國家狀況後建議將兩電准許回報下調至百分之六至八。（資料圖片）
星星又話，環境局已經收到兩電建議加價嘅申請，雙方正商討中，稍後會公布結果。咦？加價申請？港燈明明曾經宣布電費凍結至一八年，唔通出爾反爾？究竟係星星一時口快快講錯，定係鬼拍後尾枕呢？
局長新聞秘書幫手解圍，話大家不嬲都將加價理解成電費調整，局長講加價其實無特別意思，叫大家唔好諗太多喎。無論點都好，電費最終係加係減、抑或凍結，唔到揭盅一刻都唔知，市民得一樣嘢可以做，就係等囉！
