政壇：社工界選戰 泛民又互界刂
區選啱啱落幕，社會工作者註冊局（註冊局）本月二十日到下月十二日又有選舉，今次係畀註冊社工從二十三人中選出八名成員，此戰除咗係阻止註冊局「染紅」外，仲涉及泛民主派再內訌，社福界立法會議員張國柱將會火併來自社工復興運動嘅浸會大學社工學系講師邵家臻，溫和派對戰激進派，更有指，今次分分鐘係明年立法會選舉嘅試水戰添。
邵家臻：同路人角色異
註冊局由十五名成員組成，包括一名社會福利署代表、六名特首委任成員，以及八名註冊社工選出的代表。以張國柱為首嘅香港社會工作者總工會（社總）尋日宣布派出八人應戰，務求全取八個社工成員席位。同屬泛民陣營嘅參選人，仲有較激進嘅邵家臻同學校社工鍾威龍，邵家臻明言，參選註冊局成員選舉是為測試支持度，見到老牌工會如此有鬥志派多人參選，都係開心嘅事。他又自稱與社總是同路人，只係角色上有分別。
其實社工復興運動曾經公開批評現任議員張國柱對前線社工支援不足，加上張國柱大病初愈，出年是否競逐連任都是未知之數，所以邵家臻參選爭奪其立法會議席都係合理推測。究竟激進派系能否成功喺社福界突圍而出，就要等待下月註冊局這場前哨戰結果喇！
