今屆區議會選舉已成過去，但對部分人嚟講，依家先係噩夢嘅開始。好似民主黨（白鴿黨）嘅「AV仁」何俊仁咁，呢屆區選出局，對佢嘅超級議席真係一大諷刺。佢自爆前晚發夢畀人追斬同箍頸，嚇到佢手舞足蹈咁抵擋敵人攻擊，仲驚動咗枕邊嘅老婆，以為半夜三更發生咩事添。敗選後神情落寞嘅AV仁原來係將壓力暗藏心頭，結果搞到噩夢纏身，咁樣落去，真係好危險噃！

AV仁失落咗盤據多年嘅屯門樂翠選區議席，問佢夢境中係咪畀主要對手何君堯同鄭松泰追斬？佢無正面回應，只係話夢境入面有好多人，最後仲夢見有人箍住佢條頸，搞到老婆拍心口叫醒佢，先令佢掙脫噩夢。至於點解選舉過後先發噩夢，佢話係因為選舉後心情放鬆，咦，係咪掉轉講先啱呀？

九西大敗 一舊雲懶懶閒

當AV仁落敗兼夢見自己畀人追斬之際，佢黨友「一舊雲」黃碧雲就懶懶閒，似乎毫無悔意。白鴿黨喺新界東、九龍東、港島東嘅區選成績都唔差，但喺九龍西就幾乎全軍覆沒，尤其係一舊雲主打鉛水事件嘅啟晴邨，白鴿黨竟然一席都攞唔到。雖然一舊雲承認地區工作做得唔好，但講開超級議席，佢就話除咗涂謹申外，「其他（超級議席）都差唔多夠鐘」，大命嘅先唔死咁話。

除咗AV仁，今次落選嘅大佬級「雙料議員」仲有民建聯鍾樹根、EQ葛珮帆同民協馮檢基。鍾、葛喺區選後尋日首次現身立法會大會，唔少建制派議員都有上前握手同慰問，二人亦笑逐顏開，似乎回復心情。而喺麗閣選區扎根多年嘅馮檢基，落選後先退出工務小組委員會，尋日亦喺稍後時間先去到立法會，唔知係咪擺多咗時間落區，為明年立法會選舉先行救亡呢？

第一手消息請下載on.cc東網iPhone/iPad/Android/Windows Phone Apps