堅尼地城：遊樂場爛地墊 黏住當維修
「差唔多成個場嘅地墊啲邊都翹起晒，淨係用膠紙黏住，啲膠紙又甩甩哋，根本就於事無補！同埋爛咗咁耐都唔整，呢度多人行過同埋多小朋友玩，好容易戟到人！」堅尼地城居民黃小姐指科士街臨時遊樂場有多塊地墊邊緣翹起，但損壞多時未維修，僅以膠紙黏住，不滿處理草率。
科士街臨時遊樂場有四十多塊地墊損壞，被指設施質量欠佳。
康樂及文化事務署發言人表示，早前巡視場地時發現涉事遊樂場有一些安全地墊邊緣輕微翹起，隨即要求承辦商維修。期間為確保場地使用者安全，該署以膠紙暫時黏着翹起部分。有關維修工作已完成，並已更換合共四十多塊損壞的地墊。「要換四十幾塊地墊咁多，快啲檢討吓啲質料係咪有問題啦！」黃小姐希望康文署盡快就相關設施檢討，以保障使用者安全。
