今時今日，房屋問題死結難解，無殼蝸牛嘅安居之夢變得愈嚟愈遙不可及。尤其係非長者單身人士，話就話可以輪候公屋，但喺現行計分制下，上樓機會幾乎等於零，被迫淪為房屋政策嘅孤兒仔。

嗱，可能當局知衰啩，市建局最快下月接受申請嘅首個資助房屋項目「煥然壹居」本來打算將單身人士拒諸門外，依家突然轉軚放寬資格，提早為單身一族送上聖誕禮物。唔使問阿貴，當局梗係怕眾怒難犯喇。早前煥然壹居傳出唔接受未婚者申請，隨即被批評歧視，甚至有人揚言提出司法覆核添。講到尾，同樣係資助房屋，公屋、居屋接受單身者申請，早前「置安心」項目綠悠雅苑更加設有單身配額，唯獨煥然壹居大搞特殊化，點都講唔過去喇，家陣咪當衰衰哋躀一鋪囉。

講真，光棍代表孑然一身，但唔代表連購買資助房屋嘅權利都被剝奪埋，唔通未結婚就唔使有瓦遮頭咩？正所謂，宜家宜室，置業安居係組織家庭嘅重要條件，今日愈嚟愈多市民不婚同遲婚，咪就係因為一屋難求囉。港府無辦法加快建屋，為單身一族解困，反而諸多設限，唔激起民怨至奇喇。所以話，市建局今次突然轉軚，與其話係從善如流，不如話係跪低補鑊！

咁講喇，煥然壹居放寬資格畀單身人士申請固然係好事，但始終係小修小補，對解決整個房屋困局完全無補於事。唔係咩，成個煥然壹居項目估計只提供三百多個單位，就算撥出兩成做單身人士配額，都係得幾十個單位，相對於數十萬單身人士嚟講，簡直連杯水車薪都不如。最不堪嘅係，資助房屋本來已經僧多粥少，放寬資格後勢必更加爭崩頭，進一步降低其他家庭嘅置業機會，即係拆東牆補西牆嘅啫，根本解決唔到問題。都係嗰句喇，港府一日解決唔到缺地建屋嘅問題，就算點樣補鑊，都係嘥氣嘅咋，無殼蝸牛想安居樂業依然係遙遙無期。

煥然壹居個名本來改得唔錯，可以帶來朝氣同盼望，但可惜吖，港府嘅房屋政策困頓依舊，完全畀唔到人煥然一新嘅感覺。呢，因為覓地建屋寸步難行，當局早前又想打郊野公園主意，點知一日之內就被反對聲音嚇窒，不惜自打嘴巴兼打退堂鼓。唔係睇死港府，單身人士靠佢哋圓安居夢，不如等中六合彩好過，至少都叫做有個希望吖，係咪！