城中鏡：趙善銓搞Camp 教富二代理財
教人搵錢就聽得多，教人使錢聽過未﹖瑞士盈豐銀行（EFC）亞太區行政總裁趙善銓（Albert）其中一項工作就係教人使錢，事關EFC每年都會搞啲兩至三星期嘅財富管理Camp，每次大約20人，目標係讀緊大學嘅富豪後代。
趙善銓話，富二代理財、用財更精明，有助佢哋將來更上一層樓。（資料圖片）
Albert話，喺Camp入面，理財專家會教點分析股票同基金之類，令班富二代明白「使錢唔止係買車買錶咁簡單」，從中灌輸正確嘅理財觀念，當然呢啲活動會軟硬兼施，教埋各位少爺小姐點樣品嘗紅酒同收藏藝術品；另外亦會搞啲投資比賽，Albert話投資本金係500萬蚊咁上下。近排又興教多樣「捐錢」，主要係好多世界級富豪都會捐錢回饋社會，而捐錢同樣係一門學問：「捐畀慈善機構定信託基金好？捐得唔好，啲錢可能冇晒，兼達唔到預期效果。」
