中華廠商聯合會(廠商會)捐助四百萬元畀嶺南大學設立專項基金,嶺大為答謝廠商會支持,特別將綜合資訊科技學習中心以廠商會命名,尋日舉行命名典禮時,廠商會會長李秀恒(Eddy)、永遠名譽會長施榮懷同會董羅台秦(Louisa)等人都有到場,嶺大校長鄭國漢等校方代表亦齊齊出席。

李秀恒(中)、鄭國漢(右)同施榮懷齊齊試坐自修室。

方平嘆以前讀書時連自修室都欠奉。

羅台秦(左)讚揚嶺大處理學生抗爭嘅態度,旁為其丈夫廠商會副會長戴澤良。

咪以為有重要儀式舉行,就會事先「洗太平地」,Louisa發現校園一角嘅報告板上,張貼「鄭國漢下台」大字報,校方並未因為有大批賓客到來,而先行清理,Louisa讚揚呢種互不干預嘅態度好正確。佢話,雖然依家大學生好激進,但係大家唔好為此勞氣,商界亦唔應該因此而唔捐助學校。

Eddy對此都有同感,仲話廠商會已決定未來三年分階段捐出三千萬元,支持香港專上教育發展,今次就首先撥出四百萬元畀嶺大,以支援該校基層學生同成績優異學生。

李秀恒難忘書法賽贏$50

一場嚟到校園,大家不期然諗起當年讀書嘅趣事。Eddy話,小時候屋企冇錢,讀書時一心想攞獎學金。最難忘有一次參加書法比賽時取得冠軍,收到一張五十蚊嘅支票,開心到飛起,事關當年打工仔嘅月薪都只係三百元!

施榮懷同廠商會常董方平都有到場,佢哋對自修室、電腦室好感興趣。施榮懷話,讀中學時逢親考試前,就會去自修室溫書,事關屋企人多,經常嘈吵。但佢見依家興以透明膠板做間隔都感好奇,因為咁就可以望到隔籬,又點專心溫書呢?方平就感嘆話,自己讀書時代連自修室都冇喎!

第一手消息請下載on.cc東網iPhone/iPad/Android/Windows Phone Apps