政壇：搞搞政：樹根拔起唔氣餒 邊度跌低起番身
今次區選中，盤據東區漁灣逾二十年嘅建仔立法會議員「樹根」鍾樹根老貓燒鬚，輸咗畀提名期最後一日先報名參選嘅「傘兵」徐子見，有資深建制派人士形容，今次嘅區選好似海嘯，頂唔住就會被摧毀。樹根被連根拔起，應屬此例，不過，樹根尋日已揚言自己會喺邊度跌低，就邊度企番起身，呢棵枯樹睇嚟已經做緊萌芽求再生嘅準備！
黨友勸重視地區問題
今次區議會選舉有約五十名「傘兵」出選，加上今次歷史性新高嘅四成七投票率，令唔少打滾地區多時嘅「雙料議員」，包括來自建仔嘅樹根同葛珮帆，泛民則有民協馮檢基同白鴿黨何俊仁，齊遭滑鐵盧，不過，明明有四名落敗「雙料議員」，但樹根之敗，卻引起網民最大回響，更遭人「贈興」，糾眾到其位於東區漁灣嘅辦事處開香檳慶祝佢落選，政圈分析指，樹根此後可能面對更多挑戰，包括會被黨內人士「逼宮」要求退出立會議席，分分鐘變為「雙失」。
○三年區選落敗嘅建仔葉國謙，尋日就以過來人身份話，樹根下屆應該再喺同區參選，暗批樹根唔好以為市民經常喺傳媒見到自己就「飄飄然」，強調幫助地區解決問題，先會得到選民支持咁話。樹根都知衰，尋日疑開列期票，表明會喺邊度跌低，就喺邊度企番起身，似乎暗示四年後會於東區漁灣捲土重來，收復失地。
