政壇：謝票橫額蝦碌 黃碧嬌「樹根化」
政黨及議員經常大大個橫額掛喺街頭，可惜好多時唔夠謹慎，唔係錯名，就係錯字，講到網民經常喺互聯網上鬥捉佢哋嘅錯處。近日，有網民又喺社交網站上載咗一張建仔大埔區議員黃碧嬌橫額嘅照片，可以見到建仔再次犯錯，今次就係字都擺錯，真係攞命！
黃碧嬌橫額上「多謝支持」錯貼成「多謝持支」。（互聯網圖片）
呢張橫額印有喺大埔廣福及寶湖選區中，成功擊退對手嘅黃碧嬌肖像，令人眼凸嘅係橫額上寫有「多謝持支」字樣。究竟係黃碧嬌染上黨友鍾樹根嘅「樹根化」，定係眼大睇過龍？真係佢哋先知，但「多謝支持」寫成「多謝持支」，都錯得好離譜，我哋致電黃碧嬌查詢時，自稱係黃碧嬌同事嘅男子就承認，橫額係由義工喺尋晚貼上字樣之後掛出嘅，估計係一時大意貼錯字樣，佢哋好快已發現同改正，不過就快手唔過眼利嘅網民囉。又係錯由同事造成，好心啲從政者着緊啲喇，有啲責任係冇得推嘅。
