政壇：阿基盡地一煲謀翻身
新一屆區議會選舉塵埃落定，立法會議員「阿基」馮檢基喺前黨友黃仲棋「鎅票」，加上工聯會「小花」陳穎欣強勢挑戰下，以九十九票之差飲恨，失去深水埗麗閣選區議席，同時失去明年參選立法會超級區議會議席嘅入場券。喺盤據多年嘅老巢出事，阿基真係面子裏子都輸埋，結果佢同日就去信立法會工務小組委員會主席盧偉國，話基於個人理由，決定退出工務小組，阿基呢招係咪盡地一煲、為明年嘅另一場大戰做準備？答案好快就有。
阿基辭咗工務小組個會，直接效果就係開少啲會，多啲時間自己用，譬如做吓地區或九西嘅工作。如果明年阿基想重返立法會，超級議席條路已冇得行，最大機會都係循九西直選，所以，佢家吓申請減輕立會工作，都係為咗未來政治前途唔使一鋪清袋。
記得早前區選結果公布前，阿基曾事前張揚，即使區會議席落敗，都唔會再循九西參選立法會，殊不知佢真係輸咗區會議席，冇咗參選立法會超級議席嘅資格，而當結果公布後，落敗嘅阿基，卻疑有新說法，佢話，雖然失去區會議席，但一定唔會退休。
屢遇拉布 難接觸市民
政圈分析，佢很大機會「翻閹」重返九西老巢參選，不過，要重新經營地區，最需要就係時間，以及人力物力等資源配合，加上工務小組近年成為激進泛民拉布重災區，經常討論多時都議而不決，工務小組早上開會時間，亦係接觸返工市民嘅黃金機會，估計阿基迅速決定退出工務小組，正係為專心地區工作鋪路。
阿基透過助理回覆稱，佢早於區選前已計劃退出工務小組，主要考慮時間分配問題，而且盧偉國有不斷加開會議嘅傾向，呢個情況已令佢安排其他工作有困難，惟有忍痛退出喎。
