旅遊亂象禁不絕 中港官僚皆有責

唔係講笑㗎。內地官媒發表評論文章，指近年關於香港旅遊嘅負面新聞不絕於耳，今次事件嘅惡劣程度更係前所未有，雖然話係個別事件，但好難唔同其他中港衝突事件相提並論，從而得出香港社會針對內地客嘅暴戾之氣不斷升級咁話。呢，慘劇發生後，迅速傳遍全國，內地網民群情洶湧，有人話今次事件完全顛覆對香港嘅印象；有人甚至號召抵制香港遊，「珍惜生命，遠離香港」，可見官媒嘅文章講出唔少內地居民心聲。

即係咁，出門旅遊本應開開心心，家陣居然搞出人命，內地居民嘅不滿完全可以理解。問題係，旅遊亂象禁之不絕，港府固然有責任，內地當局監管不力，同樣難辭其咎，官媒將今次事件嘅責任推晒畀香港，點都講唔通。

係人都知，內地兩年前已經推出《旅遊法》，話就話明文禁止低價團及強迫購物，可惜做啲唔做啲，導致漏洞多多。正如業界人士話齋，內地監管低價團，往往管大唔管細，好多小型旅行社喺深圳組織廉價散拼團，再將旅客賣豬仔交畀香港旅行社接待，而香港導遊只係掛名性質，真正帶團嘅係內地旅行社僱用嘅「影子團友」。佢哋表面上係旅客，實際上負責強迫旅客購物，一見到旅客唔肯消費，就會出手教訓，今次涉嫌行兇嘅就包括影子團友。所以話，購物團好似無王管咁，國產官僚放任自流，必須負上最大責任。

老實講，好多專供內地旅客購物嘅商店同內地旅行社關係密切，有啲甚至係同一班人經營，形成一條龍劏客，想唔出事都幾難。今次發生毆斃旅客醜聞，香港臭名遠揚，可以講係黑狗得食，白狗當災。

當然喇，一個巴掌拍不響，如果唔係港府闊佬懶理，敷衍塞責，就唔會搞成咁。業界人士認為旅遊業議會已經完成歷史任務，港府應盡快設立旅遊業監管機構。冇錯嘞，港府幾年前已承諾成立旅遊業監管局，點知拖到依家仲未有下文，究竟係乜嘢原因呢？唔通又係不了了之？

講多無謂，食多會滯，行動最實際，唔該中港官僚做好份工，加強監管，堵塞漏洞，如果唔係，劏客醜聞陸續有來，隨時又搞出人命吖，叮！