城中鏡：盧偉國一舉兩得
呢排因為有手機應用程式被發現能讀取感應式付款功能payWave信用卡內嘅個人資料，導致銀行要收回並為客戶換卡。日前喺香港電子業商會嘅創新科技產品獎大獎頒獎禮上，見到立法會議員葉劉淑儀同盧偉國，講起信用卡保安問題，盧偉國話佢畀老婆張附屬卡每次完成交易後，都會傳手機短訊通知佢，佢就會即刻打電話畀老婆問清楚。唔知咁樣算唔算Check住老婆使錢呢？
盧偉國每次收到附屬信用卡付款短訊，都會打電話畀老婆核實。
葉劉淑儀話要請教專業人士點樣防止信用卡被盜取資料。
沈慧林同太太Rachel擔心八達通都會被盜取個人資料。
葉劉嘆「盜料」防不勝防
盧偉國仲話為確保信用卡不被盜用，佢喺換卡前會多啲留意信用卡有冇可疑扣帳紀錄，逐條數核對清楚。好似現時用信用卡付款後，銀行都會發出短訊通知，就連佢畀老婆張附屬卡亦唔例外，佢笑言每次一收到有關訊息，就會不厭其煩咁打電話問老婆係咪買咗嘢。雖然好似Check住晒，但相信盧太瘋狂Shopping後都有人自動找數，實在太幸福喇！
至於做過保安局局長嘅葉劉淑儀就話事件防不勝防，佢都有使用相關信用卡，但就冇諗到有乜嘢方法防止有人經過佢身邊時，用手機應用程式盜取佢嘅個人資料，又話呢方面嘅問題要請教專業人士喎。
另一場合上，「港版陀飛輪」萬希泉創辦人沈慧林同太太Rachel就話冇用payWave功能信用卡，但都好關注事件，因為佢哋都有用八達通自動增值功能。做金融業嘅Rachel話依家科技發達，好難避免使用呢類產品，惟有用得小心啲。
