政壇：搞搞政：搞旅監局歎慢板 Greg蘇醉心公關騷
有內地團旅客在港遭毆斃命案震驚兩地，再次喚起社會對成立旅遊業監管局（旅監局）嘅關注，可惜旅監局拖足四年一直只聞樓梯響，幾近石沉大海。但主理旅遊事務嘅商務及經濟發展局局長Greg蘇錦樑就對成立旅監局歎慢板，過去唔係外訪就係四出做公關騷，好似前日就落區參觀西營盤嘅舊式店舖，仲喺其中一間雜貨舖開心鎅豆腐兼留影，難道佢唔知道旅遊業發生咗慘劇？
設計圖片及對白
冇親身回應遊客血案
阿Greg前日先同海味業及中藥參茸業代表見面，之後分別去咗參觀西營盤老舖、探訪長者中心，以及出席香港駐海外經濟貿易辦事處聚會，行程相當緊密，但就冇親身回應慘劇，只喺事發當晚透過商經局發言人回應事件，而前日嘅連串公關騷亦似乎同改善旅遊業監管冇太大關係。究竟佢處事孰輕孰重，相信大家心中有數。
其實阿Greg喺發生重大事件時失蹤早有前科，好似前年五月，行政會議本來有一項議程討論免費電視牌照，但佢竟然漏夜飛往布魯塞爾同巴黎，展開為期六日嘅官式訪問，令當日行會以「無議程」而休會。到今年財爺鬍鬚曾喺預算案中建議引入「美食車」，負責推廣同發展嘅阿Greg則指美食車範疇「唔關佢事」，令各界嘩然。
今次內地團命案慘劇，再次觸發社會對成立旅監局的關注。其實自從一○年發生導遊阿珍辱罵旅客事件後，當局已醞釀成立旅監局。直至一一年底，政府正式建議成立旅監局，取代旅遊業議會的監管、巡查、懲處及兼任發牌嘅工作，並提升旅行社開業嘅門檻，當時預計草擬新法例需時兩年半，而阿Greg一三年亦曾講過會喺舊年中向立法會提交增設旅監局嘅草案，但結果都係無疾而終。
政府前年已預計旅監局最快今年運作，可惜講就天下無敵，做就有心無力，旅監局係咪一七年順利成立都係未知之數，究竟阿Greg對旅監局成立一事有冇上心？
