政壇：狄志遠新竇 變蝙蝠展館
退出白鴿黨嘅Dick狄志遠另起爐灶，成為新思維籌委會召集人，最緊要搵番個竇落腳。話咁快，阿Dick最近喺社交網站上載多張相片，就係佢喺油麻地和富商業大廈嘅新辦公室。
狄志遠嘅新辦公室放咗大批蝙蝠俠珍藏。（互聯網圖片）
狄志遠（互聯網圖片）
相中所見，阿Dick除咗掛咗幅自己畫嘅「黃傘畫」外，仲搞到辦公室好似個迷你展覽館咁，展示一大批蝙蝠俠Ｑ版公仔。阿Dick一向係蝙蝠俠迷，佢自爆有近一百箱蝙蝠俠珍藏，而佢嘅新辦公室擺放嘅蝙蝠俠公仔就佔咗五至六箱，佢話望住自己鍾意嘅嘢，工作都開心啲。
不過，佢擺咁多公仔喺辦公室仲有一個原因，就係屋企已經放咗五十箱蝙蝠俠物品，放滿多個儲物櫃，甚至床下底添，為免老婆「詐型」，都要收斂吓至得喇！
