依家樓市雙軌運行，一手樓長賣長有，但二手樓就交投淡靜，部分仲要減價先能夠成交，多家大行因而唱淡樓市。雖然過去一年多加息陰霾影響置業者信心，但立法會議員Paul謝偉俊就無有怕，根據立法會議員利益申報，阿Paul喺上周申報增持多三個物業，分別位於佐敦同跑馬地，但減持咗中環同深圳兩個物業，換句話喺香港多咗兩個物業。

謝偉俊

阿Paul本身擁有嘅物業集中喺港島區，但亦有涉足內地同美國。距離上次申報相隔一年半，佢終於擴張版圖到九龍區嘞，現時合共擁有二十五個物業，都算係「立法會樓王」。

佢話今次新物業同另一半聯名持有，主要用嚟放租，佐敦兩個物業已成功放租，但跑馬地物業就仲未交樓。佢明言香港樓市不明朗，但現時利息低，加上屬於長線投資，買樓「當支持香港」！佢又認為海外投資猶如隔山買牛，難以管理，未來或會主力投資香港物業。佢又話自己多公職在身，又要顧及律師樓工作，難以對股票市場作出即時反應，難怪會咁熱衷投資「磚頭」喇!

第一手消息請下載on.cc東網iPhone/iPad/Android/Windows Phone Apps