政壇：孔令瑜焗翻閹救民陣
喺佔領行動同政改方案表決一役，民間人權陣線（民陣）被學聯以至傘後團體搶奪主導權，喺現今政局「拆大台」同「誰也不代表誰」嘅風氣中，算係元氣大傷。據了解，唔少民陣中人都意興闌珊，上屆民陣四名正副召集人本來打算「裸退」，但副召集人岑子杰最終都留低轉任召集人，其餘三人就退下火線，唔再擔任職位。不過，民陣即將選出嘅副召集人，聽聞就係「翻閹」曾擔任兩屆召集人嘅孔令瑜。
設計圖片及對白
曾兩任召集人
民陣前晚舉行會議，正式確認由民陣之下嘅警權組召集人、工黨立法會議員何秀蘭助理吳仲達擔任副召集人，呢個都算係民陣領導層新面孔。另一副召集人空缺，將由人權組召集人擔任，雖然人權組仲未開會，但人選據知就係孔令瑜。值得留意嘅係，孔令瑜早喺○六年時已擔任召集人，一二年又當上召集人，近年就轉趨低調，主力搞番天主教正義和平委員會。今次佢再度「翻閹」擔任副召集人，莫非民陣真係冇人到如此地步？
老實講，民陣喺○三年遊行攀上高峰，但之後就不斷走下坡，包括畀啲新興激進同本土派組織批評為「左膠」，每次搞遊行集會只識「唱Ｋ」，缺乏實質行動同成效等，喺佔領行動後仲一度傳出後繼無人添！而喺上個月底佢哋改選，終於選出岑子杰接替陳倩瑩做召集人。
今次民陣搵番「老鬼」出嚟，係咪驚班後生壓唔住場呢？有社運中人估計孔令瑜或者係希望喺人權方面多下工夫，先出山再做副召集人。不過，孔令瑜就澄清自己未成為人權組召集人，需喺十一月初會議上先至決定，依家言之尚早。
