城中鏡：施榮恆 難忘北韓捱餓
近排有電視節目聲稱揭開北韓嘅真實一面，令當地再次成為城中熱話。原來東華三院前主席Ivan施榮恆早喺八十年代已經常到北韓做生意，每次逗留約一星期，又指現時當地建築物與當年分別不大。
施榮恆
施榮恆喺八十年代已經去北韓做生意，仲影相留念添。（受訪者提供）
Ivan話當年佢同遼寧省一間貿易公司合作，喺八十年代尾至九十年代初於北韓經營紡織品同布匹生意，亦不時會見到有日本商人搵當地人做西裝加工。提到印象最深刻嘅事，Ivan話係食早午晚三餐都要提前落柯打，話說有次夜晚應酬夜咗冇同酒店講定翌日早餐食乜嘢，結果第朝起身就冇得再叫嘢食，要餓到食午餐。而當地嘅食物亦好清淡，都係食粥、鹹魚、泡菜等，但啤酒就由當年嘅一款變到依家六款咁多。佢仲笑言，事隔多年，有機會或會再去喎。
