政壇：搞搞政：佔領周年 雙學低調等落鑊

民間人權陣線前日同學民思潮、學聯（雙學）及多個傘後團體開會，討論「九二八」一周年活動。民陣副召集人陳樹暉稱，有多個民間團體有興趣喺九二八當日或之前舉辦紀念活動，民陣將會負責統籌及作聯合宣傳，但具體活動形式未有共識。據悉「雙學」落實同民主教室合作，將喺九月二十八日前一星期，一連多日舉辦公民講堂，邀請大學教授分享，主要目的係紀念罷課一周年，課題會圍繞公民社會，至於九二八當日，暫時未有具體行動。

此外，有網上組織亦發起「再偶遇在金鐘」，聽聞有團體會舉辦默站、藝墟行動，學民思潮另外又會搞內部退修會。「雙學」同傘後組織都未有打算在九二八當日發動大型紀念或抗爭活動，未知係咪因為舊年非法佔領行動而將被檢控，打算「守行為」避免再犯事加重刑罰呢？其實「雙學」領導層自佔領行動失敗後已各散東西，基本上從鎂光燈下消失，人氣已大不如前，而學聯更為退聯風波「後欄失火」，影響力大減，好難再結集力量發起大型抗爭，不如趁住中秋節，大家圍埋煲蠟當慶祝算啦！

召返政總 人力吹水

除上述嘅「和理非」活動外，人民力量近期亦喺街頭宣傳，聲言會召集一千人在九二八當日重返政府總部，喺五點五十八分發放催淚彈一刻，走出告士打道佔領街道八十七分鐘，寓意當時發放八十七枚催淚彈，但估計係「吹水」居多。

泛民方面，據聞已表明唔會主動舉辦佔領紀念活動，原因係整個佔領行動是由「雙學」同佔中三子發起，泛民只係作支援角色，聽落似乎就有陣酸溜溜味道。不過，係咪因為區議會選舉臨近，泛民為箍選票不惜同佔領行動及傘後組織劃清界線呢？