富貴黨嘅立法會議員張宇人日前高調表態，聲言有意競逐內務委員會主席一職，仲得到一眾黨員表態支持。不過，富貴黨口響咗幾日，一聽到建制派話要封殺該黨就腳軟，該黨榮譽主席田北俊尋日朝早就喺電台節目上放軟態度話，如果張宇人唔夠支持就會放棄。點知張宇人下晝就隨即召開記者會，宣布放棄競逐內委會主席，因為發現自己唔夠支持票喎。其實富貴黨應該早知玩唔起，又何必當初呢？

張宇人早前表態競逐內委會主席時，講明會爭取泛民主派支持，但係佢尋日宣布放棄爭位嘅同時，話自己仲未開始向泛民主派拉票，諗住先向建制派拉票。佢透露有建制派議員支持，亦都有人唔支持，更加有人話要諗諗先。

唔會選財會主席

被問到係咪因為中聯辦畀壓力，先至臨時放棄爭位，張宇人就話自己唔識普通話，中聯辦嘅朋友都冇搵過佢講呢件事。不過，田北俊就透露曾與中聯辦官員見過面，雖然話無討論過呢件事，但依家咁樣縮沙，大家都知乜事啦！

點解想做內委會主席？張宇人話主要係想接受新挑戰，想學嘢，又話眼見政府施政有困難，想幫政府喎。之後講到唔夠票支持，證明大家都覺得唔需要佢去幫手，咁樣佢可以慳番啲時間湊孫，唔使啲孫只係睇住電視叫爺爺喎。

佢仲話唔會因為無得做內委會主席而去選財委會主席，覺得好難接受，一係就做主席，一係就唔做，一定唔會做副主席喎。其實講咁多，都係想跌落地揦番拃沙啫！

第一手消息請下載on.cc東網iPhone/iPad/Android/Windows Phone Apps