城中鏡：楊張新悅忙為兩女開學做準備 自喻環保怪獸
就嚟又開學嘞！尋日喺一個公開場合見到教育局前政治助理楊哲安嘅太太楊張新悅，佢透露依家忙為兩女開學做準備，自稱係環保怪獸嘅佢，笑指長女嘅用品會畀兩個妹妹循環再用。佢又話孻女下個月就滿一歲，但唔會搞派對嘞：「百日宴都冇搞，其實冇人會理，生第一個就緊張，會收到好多禮物，到第三個人哋連囡囡個名都唔記得。」
童愛玲（左）同楊張新悅大談湊仔女經。
同場仲見到藝人童愛玲，佢話暑假陪囝囝兩個月，尋日開學，佢終於唔使「返工」，笑說：「囝囝今年上中學，話嚟緊會少時間見我，今個暑假想同我一齊，咁我咪帶佢周圍去玩，又請咗個私人籃球教練，佢就快十二歲，但好大份，飲啖水都肥，依家就好fit，買衫買鞋都有要求，又唔肯剪短髮，話要留長，依家行型格路線。」問到佢會唔會追個女？佢話一直都喺度嘗試，但唔會考慮人工受孕，笑言老公希望「靠自己」。
