名媛Sharon郭秀雲繼囝囝Andrew龐景峰早前正式簽約做歌手後，加上喺醉心音樂多年嘅富商老公龐傑感染下，竟興起推出個人Hi-Fi碟嘅念頭！Sharon因忙於到各地宣傳環保工作，故計劃仍喺初步籌備階段，佢話：「對於音樂一向都好鍾意，同埋我爸爸係音樂劇嘅男高音，所以自己都有少少音樂細胞，其實之前為慈善已經出過一張專輯，喺一個月內就錄晒啲歌。」

另外，Sharon透露早前為咗祝賀女友人嘅八十歲大壽，特意錄製咗一首英文歌曲獻畀對方，而喺MV中老公龐傑仲為佢擔任結他手一職，佢話：「MV一take過就拍攝完成，入面除咗有我同老公之外，仲有側田嘅叔叔資深音樂人Ted Lo負責彈琴，其實佢係我哋兩公婆嘅媒人，因為佢同我老公由細就玩到大。」

第一手消息請下載on.cc東網iPhone/iPad/Android/Windows Phone Apps