城中鏡：廚房電氣化
坊間有傳言話廚房熱辣辣，會影響男士嘅生育能力，不過，御苑皇宴執董Simon黃傑龍就話，旗下廚師個個都好多仔女，相信傳言未必係真，但廚房太熱確實令青年人入行卻步，搞到飲食業請人難上加難。為咗改變現況，飲食界就推行綠色廚房，更換新式爐具，廚房冇以前咁熱，廚師工作環境大大改善。Simon日前就聯同稻香集團企業發展部總經理區鳳儀帶大家參觀旗下食肆嘅環保節能廚房。
黃傑龍展示用咗環保節能爐具之後嘅廚房不再充滿油煙。
林浩文（左）同「鍾菜」業務經理倪振邦，示範將百元鈔票放喺電磁炒爐同鑊底間炒餸。
菜式依然火候十足
Simon話一般環保節能廚具表面上成本較貴，但其實回本好快，仲可以慳到三至七成煤氣或用電量，識計數就會好抵用。早前旗下食肆就安裝咗兩部綜合式熱泵，可充當熱水爐之餘，個熱泵仲會排出冷風，廚房都涼快好多。佢又話以前俗稱會「燒腳毛」嘅「矮仔爐」，依家嘅新設計就算企喺隔籬都唔覺熱，唔使擔心冇仔生啦！
另一邊廂，區鳳儀就帶大家去睇旗下「鍾菜」開放式廚房，對年輕人覺得做廚好辛苦，佢哋就諗到轉用無火嘅電磁炒爐同電熱蒸櫃等，煮出嚟嘅菜式一樣火候十足，而且電能煮食爐具容易操作，既加快煮食速度，又可減少廚師工作量，有效緩和飲食業人手荒。
同場仲有綠色建築議會綠色食肆專責小組成員邱金榮同中電副總監林浩文，為咗示範同測試電磁炒爐可以直接傳熱到鑊內而熱力唔會四散，林浩文將一百蚊紅衫魚放喺電磁炒爐同鑊底之間，師傅炒完餸之後喺鑊底拎番張一百蚊鈔票出嚟，依然乾乾淨淨絲毫無損。
