政壇：「股壇小甜心」暫別幕前
呢個消息，若然唔覺意令到你有些少空虛，唔好意思。各位嘅「股壇小甜心」，即係金英証券（香港）零售研究部副總監Sonija李韻儀話自己「三十而立」，要暫別幕前，連專欄都暫收筆，佢話希望退居幕後專注深入嘅證券分析工作。
李韻儀話希望退居幕後專注證券分析。（資料圖片）
點解唔留番個專欄keep吓人氣？Sonija話自己都係凡夫俗子，向虛榮Say No亦唔係易事，不過既然決定轉型，就要專心一致。Sonija又話自己其實唔鍾意講嘢，亦唔識講嘢，呢七年股評人生涯，佢其實每晚喺屋企練習朗讀報紙，仲叫埋屋企人扮節目嘅家庭觀眾同主持，幫佢訓練應對。
當年被人叫做「全港最年輕股評人」，Sonija就決心要考番啲專業資格，以補投資歷練不足，呢四年佢就攞到財金風險管理分析師（FRM）同特許金融分析師（CFA）資歷。
佢話衷心感謝各位讀者同前輩嘅支持同鼓勵，祝各位身心健康、投資得利。你係佢fans？放心，Sonija點會唔記得你哋，佢有話「後會有期」(O架)。
