政壇：張新讚大媽 股災舞照跳
強大嘅國家，除咗有強力嘅政府，仲有堅強嘅人民，當中最堅強嘅係大媽，股照輸，舞照跳。首先欣賞到大媽呢樣內在美嘅，係中糧包裝主席張新，佢尋日話就算內地股災，A股股民都好堅強嘅，話晒都經歷咗幾十年股市上上落落。佢仲話啲大媽以前買黃金輸咗錢，咪又係喺廣場跳舞；張總仲話股市春風吹又生。
大媽股照輸，舞照跳，張新都讚「強」。
又係呢句「春風吹又生」？早兩日，中州證券董事會秘書徐海軍先引用過唐代詩人白居易呢句詩，嚟安撫「受傷的股民」喎。張總話上半年經濟波動，但公司銷量都keep到，所以佢覺得，股災其實對實體經濟影響有限，兩者關係唔大。佢仲話股災都有積極嘅一面，內地股民會更專注工作。講到A股，咁中糧包裝會唔會回歸A股？張總話唔會喇，因為佢哋鍾意香港，亦鍾意香港嘅「價值投資者」，比起內地嘅「概念投資者」更睇重公司業務。
講番股災，除咗吟詩外，有冇啲實際嘢去安撫「災民」？聽講內地有啲企業畀員工放「股災假」散吓心先再返工喎。張總話明冇，事關母公司中糧集團仲有其他包裝業務，未來可能會注入公司。戰略部總經理黃進仲話公司「多訂單，要幹活」，唔可能放假影響進度。
