政壇：壞車阻路 徐英偉遭鬧爆
近期民政事務局真係多事發生，繼原局長曾德成上月突然「被炒」後，局長政治助理徐英偉嘅私家車尋日又喺繁忙道路「跪低」，釀成大塞車！話說佢駕車出席地區活動，當駛至西九龍圓方附近，正要駛出高速公路前，唔知點解突然「死火」。
徐英偉上載座駕拋錨同車龍相。（互聯網圖片）
徐英偉企喺馬路邊等拖車，足足等咗一個半小時先嚟到。當時正值下班時間，引致附近大塞車，徐英偉一直企喺壞車旁邊等候，唔少路過嘅司機「一邊行一邊鬧」，話「阻住佢哋放工」，徐都覺得超唔好意思。佢其後仲要趕落區工作，好在地點喺附近，但已經遲大到。現仍未知點解會壞車，亦唔知要幾多錢維修，唔知佢會否考慮今後改搭公共交通工具呢？
