政壇：肥佬黎 臨落鑊 盡情玩樂
壹傳媒集團前主席「肥佬黎」黎智英舊年被揭發曾向泛民團體及人士秘密捐款逾四千萬元，佢喺舊年九月一度到廉政公署受查，至今事隔一年仲未有下文。肥佬黎早前又離港外遊一段時間，事有湊巧，期間執法部門對涉及佔中捐款醜聞嘅行動排山倒海而來，而社民連主席梁國雄同前任主席陶君行更前後腳到廉署「飲咖啡」，疑與捐款醜聞有關，肥佬黎離港莫非係想避風頭？抑或臨「落鑊」前作最後盡情玩樂呢？
查秘捐少許寸進
執法部門喺佔領行動一周年前夕疑加快行動，首先最少檢控八名喺舊年九二六衝擊俗稱「公民廣場」政府總部東翼前地嘅示威者，包括「雙學」學民思潮召集人黃之鋒、學聯秘書長羅冠聰同前任秘書長周永康等首腦人物。
至於被揭發超過一年嘅捐款醜聞最近都有少許寸進，曾代所屬政黨收取肥佬黎五十萬元嘅梁國雄，以及曾於一○年獲肥佬黎捐款一百萬元嘅陶君行，亦前後腳現身廉署，外界估計，疑與肥佬黎向泛民秘密捐款醜聞有關，事後梁、陶二人都以「唔講得」為由封口，認真係耐人尋味。
至於捐款醜聞嘅主角之一、被指係泛民最大「金主」嘅肥佬黎，較早一段時間離港疑似「避風頭」，尋日仲透過壹傳媒旗下雜誌撰文，自爆早前一度身處位於美國紐約州的Saranac Lake，佢形容呢個地方係湖景嘅桃花源，住嘅酒店係狩獵別墅，仲懶有文采形容自己「懶洋洋滑進潛意識裏，臥睡在湖的大腿上，風吹輕撫我清爽，睡着了」。「臥睡在湖的大腿上」，唔知道仲以為係「吹氣大腿」。
返港時臉容憔悴
不過，醜婦終須見家翁，肥佬黎離港多時始終要返港面對現實，發現佢臉容憔悴。遇上執法部門疑加快處理涉及佔中同捐款醜聞嘅個案，加上一如有政界中人指捐款醜聞證據確鑿有晒單據，如果有關方面唔果斷執法，或令人質疑有執法部門係怕咗外國勢力。
凡此種種迹象顯示，似乎肥佬黎避無可避，「落鑊」再唔係遙不可及，或者只係時間問題，莫非因此令佢要外遊盡情玩樂，有得食好食，有得玩好玩？
