高鐵延誤無了期 超支黑洞誰填氹

高鐵工程一延再延，造價一升再升，早就唔係新聞，家陣最大問題係究竟超支幾多，以及邊個埋單。有消息指超支額可能由二百五十億元增加至三百億元，令總造價進一步飆升至九百五十億元。對於有關傳聞，運輸及房屋局局長張炳良一問三不知，話要等港鐵今個月底向政府呈交高鐵最終造價估算，先至評論喎。

高鐵造價高處未算高，通車亦係遙遙無期，原本計劃一五年通車，後來推遲至一七年，依家連一七年呢個目標都打定輸數。張炳良承認對高鐵能否如期通車「感到憂慮」，特別係西九總站工程進度，更加同政府當初預期有好大出入。唔使問阿貴，一七年通車嘅目標肯定凍過水喇。

話時話，高鐵香港段只有廿六公里長，造價竟然接近千億元，名副其實「黃金鐵路」，簡直貽笑國際。之所以搞成咁，張炳良解釋係因為港府首次委託港鐵負責工程管理，以致政府陷於被動，日後會檢討喎。冇錯，呢種模式權責不清，問題多多，的確有必要檢討，但家陣連點樣收拾爛攤子，超支由邊個填氹都未傾掂，仲講乜檢討吖。

唔係講笑，高鐵超支筆數邊個負責，分分鐘又係一筆糊塗帳。咪睇港府表面企硬，聲稱即使延誤或爛尾都唔會硬啃超支額，其實港鐵有合約在手，點會讓步吖。如果由港府埋單，大拿拿幾百億元，莫講話市民反對，反對派阻撓，建制派亦冇可能開綠燈，根本好難過到立法會呢關。再講吖，即使最終由港鐵負責，羊毛出在羊身上，最終咪又係反映喺票價上，由乘客埋單。

有人形容高鐵係雞肋，真係一啲都冇講錯。唔講延誤超支呢筆，一地兩檢問題未解決，被迫改為兩地兩檢，分分鐘慢過直通車，高鐵變低鐵，你話係咪得啖笑吖。

見微知著，今日香港基建延誤超支成災，除咗高鐵，港珠澳大橋、西九文化區等亦係問題多多，幾乎無一不延誤，無一不超支，以往引以自豪嘅「香港速度」，早已淪為烏龍甩漏嘅代名詞，唔通香港真係氣數已盡？叮！