政壇：WhatsApp保密 名人有計
建制派議員嘅WhatsApp群組對話外洩，令人關注呢類即時通訊程式嘅安全，鄉議局主席劉業強（Kenneth）認為，WhatsApp群組愈開愈多，有時佢索性唔睇唔覆，寧願好似爸爸劉皇發咁唔用WhatsApp，有咩直接電話講。身兼全國政協委員嘅Kenneth話，省級政協之間的確有個群組，但全國政協就唔覺有喇，笑言可能係同事冇邀請佢加入，但就唔擔心有「鬼」喎。
劉業強（左）笑言WhatsApp群組愈開愈多，未讀訊息多到睇唔切。右為劉太葉愛愛。
中電企業發展總裁莊偉茵（Quince）尋日同丈夫罕有咁帶埋大仔Julian現身馬場。Quince坦言，由於中電接觸好多客戶資料，所以內部一早已經有指引處理敏感通話或訊息，好似每次都為中電活動開一個新嘅WhatsApp群組，事後即時清除群組免後患，而涉及客戶資料嘅溝通更加唔會用WhatsApp處理，所以唔擔心資料外洩。
留學澳洲嘅Julian難得放暑假返港陪父母，原來Julian讀完學士之後，繼續留喺當地嘅澳洲國立大學修讀公共衞生碩士，會唔會考慮回流工作？Julian話計劃兩地搵工，視乎邊度有公司聘請囉。
