政壇：搞搞政：湯家驊交錯辭職信 炒燶魷魚要補鑊
身為資深大律師、兼做過大律師公會主席嘅前公民黨（公文袋）立法會議員湯家驊（大口湯），又再記錯法律，將本應遞交畀立法會秘書嘅辭職信，寫錯咗畀立法會主席曾鈺成，結果，聽日要再辭多次職「補鑊」。今次真係「炒魷」都炒燶，夠晒「失敗」喎！
設計圖片及對白
大口湯上周一（二十二日）宣布退出佢有份創立嘅公文袋，並同時向立法會主席遞交辭職信，預告喺今年十月一日起辭任立法會議員席位。但大口湯尋日突然自爆，原來法例規定立法會議員辭職，須向立法會秘書遞信，故佢日前向主席遞交嘅辭職信，喺法律上根本無效。佢強調唔會反口食言，明日會重新向秘書補交辭職信。
被揭僭建 羞家記錯法律
《立法會條例》第十四條規定，任何議員可隨時向立法會秘書給予書面辭職通知辭去議員席位，而辭職信須附有議員親筆簽名，並訂明辭職嘅生效日期。其實今次並非大口湯首次記錯法律。幾年前大口湯亦被傳媒踢爆有多項違規建築。佢起初死撐自己打過一單僭建官司，堅稱其寓所嘅僭建物屬於法例豁免範圍，毋須清拆。但翌日即有法律界朋友「點醒」佢，話佢提及嘅裁決其後已被上級法院推翻，大口湯惟有「認衰」自認記錯法律，並急急搵承建商清拆有關僭建物，認真羞家。
