政壇：田少同細佬罵不停口
現屆立法會內唯一「兄弟班」，自由黨田北俊（田少）同新民黨田北辰（田二少），上周剛剛就政改方案表決「甩轆」責任誰屬公開嗌大交。做阿哥嘅田少喺社交網頁上載咗張豬仔相，疑譏諷當日拉隊離場的三十三位建制派議員係豬，變相鬧埋自己細佬；而田二少都反擊插番大佬。尋日田氏兄弟又就建制團結問題各有各講，唔對嘴嘅情況，真係同中聯辦主任張曉明日前講嘅故事主角，即棲身廟宇嘅賣被及賣餅嘅人，唔肯互相扶持、共渡難關，最終一凍死一餓死有得揮。
設計圖片及對白
中文麻麻WhatsApp少發言
田少喺節目中，直認建制派唔及泛民主派團結，原因係建制派有啲來自工商界、有啲來自基層，喺好多勞工及福利政策上完全對立。佢又澄清當日擺隻豬上網，純粹係想「呃Like」及針對「甩轆」事件兩大關鍵人物、經民聯林健鋒同民建聯葉國謙，無意指所有離席建制派議員都係豬。田少講講吓，又話自由黨五子較少參與建制派WhatsApp群組討論，原因之一係佢哋嘅中文麻麻。講到日前嘅中聯辦茶敍，田少話，佢最初以為會有多名建制派缺席，但最後就變成得佢同有病在身嘅劉皇發冇到，令人以為佢因之前嘅政協「搣柴」事件而同中聯辦有心病，唔通佢畀人跣一鑊？
田二少喺電台訪問中就同大佬唱反調，話「甩轆」係因為建制派太過團結，先至搞到葉國謙等人帶頭拉隊離場，包括佢在內嘅部分建制派議員，即使唔知發生緊乜事，或者心裏面認為其實應該留低投票，最終都跟咗大隊離開，缺乏「執生」嘅勇氣。
佢哋各有各講，但正如張曉明所講，賣燒餅嘅唔讓，賣棉被嘅又唔肯讓，最終大家都冇好下場，建制派真係有必要諗吓團結喇。
