廚餘回收有價值 廢官直送堆填區

嗱，好似廚餘回收咁吖，人哋南韓早喺十年前立法禁止將廚餘送往堆填區，回收嘅廚餘幾乎百分百用嚟生產飼料、堆肥同再生能源，即使係鄰近嘅台灣，回收率亦高達四成。反觀香港一拖再拖，舊年至開始試行，而全港首個展開「中央處理廚餘」項目嘅私人屋苑杏花邨，日前公布中期結果，成果唔錯o架，全邨過去一年共回收近四百公噸廚餘，運送到回收機構循環再用，製成廿幾公噸豬糧；調查又發現超過五成住戶認為計劃啟動後，屋邨環境有所改善，計劃未來將參與率再提升一成咁話。

係人都知，家陣三個堆填區已經接近飽和，而廚餘足足佔堆填區廢物總量嘅三分一，推行回收刻不容緩。既然家陣居民反應咁踴躍，點解唔乘勢擴展至全港呢？使唔使研究再研究，測試再測試呀？大家睇吓以下數字就明o架嘞，目前小蠔灣廚餘發電廠每日只能處理約二百噸廚餘，相對於日均三千六百多噸嘅廚餘總量，根本係杯水車薪，基礎設施跟唔上，市民再熱心都係嘥氣。

更離譜嘅係，當局開口埋口叫人「咪做大嘥鬼」，其實係有口話人冇口話自己。有人推算過，食環署轄下七十五個街市每日丟棄超過十四公噸剩食，足夠一個成年人食三十幾年，你話幾咁諷刺吖。

講真，港府推行環保眼高手低，講多過做，回收廚餘歎慢板只係冰山一角咋。廢物分類講咗咁多年，到依家仲係停留喺三色回收桶階段；家陣手機更換率愈來愈高，廢棄舊電池愈來愈多，造成極大污染，但喺香港想搵個回收站仲難過登天，完全落後於時代發展。仲有膠袋徵費，宣傳唔夠，又多灰色地帶，結果環保變擾民。正所謂，其身不正，何以正人，環保官僚冇做好自己份工，毫無承擔，淨係識得打劫市民荷包，唔怪得回收廚餘、垃圾徵費以至擴建堆填區，通通寸步難行喇！

有人話︰廢物分類，由官做起，的確幾有道理o架。講真，廚餘回收都仲話可以發電做肥料，死剩把口嘅廢官除咗直送堆填區，睇怕都冇乜剩餘價值咯，叮！