城中鏡：黃志祥電話無停

用手掩口 一臉嚴肅

尋日下午約三時許，黃志祥一貫西裝骨骨，手持長遮於金鐘一個商場出現。

佢喺商場三樓開始，就一直拎住電話講個不停，起初見佢用左手拎住電話，之後講講吓，又用手掩住個口，企定定挨埋商場啲欄杆度講咗陣，表情一臉嚴肅，似乎係傾緊啲好重要嘅事情。

過咗一段時間，佢繼續邊行商場邊傾電話，期間由三樓落到二樓後，終於收線並行咗入一間時裝店，佢一入內就同舖頭職員打招呼，仲暫時收起嚴肅表情，露出燦爛笑容，但佢哋寒暄咗冇幾句，電話又再響起，因此未嚟得切購物，就急急腳離開時裝店。

其後佢行入書店，喺雜誌欄附近閒逛，又喺放歷史書嘅書架前打書釘，但期間依然不斷有電話打入，又睇書又傾電話，周身唔得閒。十幾分鐘後，佢買咗啱心水嘅書，右手拎住袋書，左手拎住電話離開。