教協喺七十年代成立時主打教育議題,較少直接涉足政治,直至前立法局喺八五年引入教育界功能組別議席,教協先首次派人參選。之後港同盟同白鴿黨先後成立,教協前後兩任會長兼兩位立法會教育界議員司徒華同張文光,都身兼該黨嘅創黨成員。到上屆立法會選舉前夕,原定參選教育界嘅現任教協會長馮偉華,亦喺選舉前加入咗白鴿黨,豈料其後佢突然驗出身患頑疾,改由無黨籍嘅教協原總幹事葉建源參選,先斬斷咗教協立會代表同時喺白鴿黨黨員嘅歷史。

設計圖片及對白

「激進」「溫和」兩派爭拗

其實教協早喺由張文光主政過渡到馮偉華坐正期間,內部已積極研究政黨化,目標係喺立會落實全面普選、教育界功能組別完成歷史任務後,以新政黨名義喺各區參選,希望憑藉教協喺全港九新界合共有近九萬名會員嘅優勢,成為一股獨立於白鴿黨嘅政治新勢力。但有教協中人近日話,隨着人大常委會作出「八三一」決定,一七年特首普選承諾隨時落空,立會全面普選遙遙無期,教育界功能組別喺可見將來都會繼續存在,教協嘅組黨大計經已正式擱置。

有熟悉教協情況嘅人士分析,早喺佔領行動爆發前,教協溫和派同激進派之間嘅分化同內鬥已日益白熱化。以韓連山為首嘅激進派成立嘅「進步教師聯盟」,喺舊年初大舉派人參選教協理事會,成功喺張文光同馮偉華為首嘅溫和主流派手中奪取一定席位,令溫和派喺往後嘅「雙學」罷課同佔領行動中被迫愈走愈激,兩派就不同嘅教育同政治議題亦不時出現爭拗。如果教協喺呢個時候組黨,究竟應該走溫和定係激進、走「大中華」定係「本土派」路線,肯定又會拗餐飽,甚至最後會正式分裂,一搞就搞咗兩個教師黨出嚟,咁就不如暫時唔搞好過。

第一手消息請下載on.cc東網iPhone/iPad/Android/Windows Phone Apps