政壇：黃友嘉盼平心靜氣論對沖
打工仔最關注強積金「實質落袋有幾多」，新上任嘅積金局主席黃友嘉話強積金表現「唔係外界講到咁差」，因為依家積金局滾存嘅六千億元資產規模中，當中一千五百億元屬投資回報，兼且自願性供款亦有增長，直言對強積金有信心。佢又話未來可考慮研究准許動用強積金作首次置業同扣稅，增加自願性供款誘因，但提早取回供款作醫療用途則未必可行，憂慮咁做會大開缺口，有違強積金作保障退休生活嘅原意，需要小心處理喎。
黃友嘉對強積金好有信心。（資料圖片）
未來兩年力推核心基金
黃友嘉話強積金管理局未來一兩年嘅工作重點，分別係推出核心基金同研究推出中央電子平台，方便打工仔查閱同管理強積金帳戶。佢話仍與業界商討核心基金細節，冀年底交立法會商議，並喺明年內落實，基金管理費會以百分之零點七五為上限，盼可起指標作用，促進市場競爭，令基金管理收費下調。局方又希望透過落實電子平台，整合各強積金管理公司資料，方便用戶檢視個人帳戶，仲會聘請顧問研究，預料喺年底會完成報告。
本港樓價高企，黃友嘉認為可研究讓市民動用強積金作首次置業，但暫時未有計劃在積金局董事局討論呢個議題。講到強積金嘅對沖機制對打工仔不公平時，佢認為「各方都要坐低平心靜氣傾，因為呢個牽涉到討價還價，同邊個埋單問題」。
