政壇：楊哲安唔做怪獸家長教女

話時話，每逢喺暑期前夕，就會見到有大批家長一早為子女排隊報讀暑期班，令外界再度反思，一旦過猶不及會唔會有反效果，本身有三個囡囡嘅教育局前政治助理Jeremy楊哲安話，自己唔會做「怪獸家長」催谷三位愛女，更加唔會安排佢哋報讀國際學校或直資學校，寧願等傳統攪珠派位。

楊哲安一家人早前到添馬公園，佢表明唔會做「怪獸家長」。（互聯網圖片）

Jeremy透露，唔鍾意幫三個愛女安排太多暑假活動，即使大女今年預備升小一，亦唔諗住幫佢報讀直資或國際學校，一來佢對本地免費教育系統好有信心，二來自己做過教育局官員，費事瓜田李下，惹來任何嫌疑。

佢又話「怪獸家長」依家已經落伍，外國最新興起嘅係「剪草機家長」，即係幫仔女剪走所有障礙，鋪條平坦草地畀小朋友，等佢哋跌低都冇咁傷。佢認為失敗同挫折係小朋友學習過程中不可或缺，如果唔畀佢哋跌低，到成長後承受唔到失敗，分分鐘會出現悲劇。