政壇：鄺美雲「放生」有心得
珠寶商人Cally鄺美雲尋日出席佛誕活動，信佛多年嘅佢提到近日唔少人放生變「送死」，佢揚言放生實屬一件好事，但勸喻放生人士謹記唔好對外指定任何海產或放錯水域，以免商人有機可乘同謀害咗小生命。
鄺美雲感謝天公作美，一上台就放晴。
梁釗峰獲邀到場獻唱。
Cally話連日忙於為活動進行綵排，所以有唔少精彩表演節目。佢又透露自己已加入佛光會十五年，每年必親自現身到場支持，佢更感謝天公作美，天氣晴朗：「前幾日仲好大雨，每年綵排都會落雨，上台前一定仲落緊，好彩一上台就放晴。」
免指定動物 防放錯水域
問到近嚟好多人指摘放生動物等於殺生？佢個人認為：「其實做善事最緊要係做好事，說好話，存好心，有啲人去放生，啲商人捉啲海產去畀你買，咁就唔係幾好，平時幫多啲其他人最好。」即係你唔建議放生？佢又話：「好難講，但放生係好事，我覺得啲人最好唔好講定或指定要邊種動物，如果唔係啲商人就會去捉定嚟賣，同埋啲海產一定唔好放錯水域，要放啱鹹淡水，否則啲動物會死o架。」
獲Cally邀請嚟擔任表演嘉賓嘅組合C AllStar成員Andy梁釗峰就話舊年亦有到場獻唱，佢大讚對方係一個推廣宗教活動嘅好榜樣：「佢推動幼兒、青少年同三好嘅事，我覺得佢搞到好有聲有色。」問到係咪信佛？佢話：「我係同佢共同學佛，但就未係真正皈依，但好鍾意聽到Cally講佛偈、道理。」佢又笑稱每次皆將佛偈內容轉述其餘三位隊員，常令隊員大感煩躁。
