政壇：泛民玩團結 卿姐潑冷水
喺政改表決前，唔同陣營嘅團體相繼落區宣傳，催生唔少新組織成立。由工黨、公文袋、社民連、學民思潮同民間團體組成嘅「全民拒絕假普選運動」，尋日宣布會喺六月七日發起「真‧落區」行動，派六隊人走勻港九新界，宣傳拒絕假普選。雖然出席嘅代表再三強調，今次行動證明泛民團結一致反對「袋住先」，不過白鴿黨主席劉慧卿即場發言，叫某啲團體唔好再喺網上攻擊白鴿黨，話咁嘅行為係不能接受，擺明係寸泛民假團結。
設計圖片及對白
「全民拒絕假普選運動」尋日舉行成立記者會，雖然發起同參與嘅團體多達十八個，但唔係每個團體都有派人出席，有出席記招嘅團體代表話，最近有唔少關於泛民分裂嘅報道，今次行動正好證明泛民團結一致，另有人提到要用行動向立法會議員施壓，亦要打好網絡輿論戰。學民思潮新任發言人黃子悅話，最近聽到泛民可能同中央會面，樂見有議員表明會否決政改。
唔知係咪呢啲說話觸動咗卿姐嘅神經，佢發言時就提到有人喺網上攻擊白鴿黨一事，指出依家咁多團體團結一致，堅決唔接受「袋住先」，大家坐埋同一枱，但仍然有人喺網上指摘白鴿黨嘅不是，批評呢啲行為係唔可以接受，認為做事要有包容心態。
擬政改表決前搞「滾動式」集會
佢最後仲點出民陣召集人陳倩瑩嘅英文名Daisy，表明「相信咁好難搞」，疑暗示有關人士要就此作出跟進，被點名嘅陳倩瑩冇正面回應卿姐嘅言論，只係話六月初會再同傳媒交代最新情況。
「全民拒絕假普選運動」又宣布，政改表決前搞一個「滾動式」集會。陳倩瑩話，假設政改方案喺六月十七日交畀立法會表決，佢哋就會喺同月十四日開始，連續五日舉行滾動式集會，每朝到立法會示威區集會，直至晚上離開，翌日再集會。
當問及政改若通過，集會人士會否即刻衝擊立法會，陳倩瑩話會考慮呢個最差嘅情況，但強調民陣唔鼓勵人衝擊立法會，衝擊嘅人亦要負責任，似乎係想同可能會出現嘅衝擊情況劃清界線。
