求人不如求己,求官不如食自己。港產官僚出名A字膊兼欺善怕惡,搞到要市民做埋佢哋嗰份,你話係咪混帳吖!

係咁嘅,立法會旁邊嘅添美道尋日上演一場大龍鳳,有團體高呼「替天行道,不要霸路」等口號,聲稱要拆除佔領人士嘅帳篷,雙方對峙,幾乎開大片咁滯。計太一叮話齋,與其話係「替天行道」,不如話係「替官行道」。喂,佔領鬧劇雖然早已收皮,帳篷反而好似癌細胞咁不斷擴散,立法會佔領區出現超過五個月嘞,當局竟然聽之任之,激到市民要自發拆篷,簡直吹脹。今次就話和平散場啫,下次認真難講,呢,只要睇吓有市民揚言喺銅鑼灣等區紮營「反佔領」,就知民怨有幾大喇。

歌仔都有唱︰沉默不是懦弱。市民如果唔係忍無可忍,又點會激到生蝦咁跳吖。大家有眼見,佔領區帳篷唔單止不斷擴散,部分更加升呢至由木條搭成嘅木屋,有啲仲加埋活輪,十足碉堡咁款,擺明要長期作戰。咁都未算,佔領人士吃喝拉撒睡全部喺帳篷內搞掂,引發嚴重衞生問題;仲試過有佔友互相毆鬥,最終鬧上差館,直頭係沒有最亂龍,只有更亂龍呀。

最離譜嘅係,佔領區非法霸道,民意強烈要求取締,官老爺居然一個二個好似孔融讓梨咁,地政總署、行政署、食環署同警方你讓我我讓你。其中警方係咁講嘅,如果有違法行為需要警方跟進,會嚴肅處理喎。咁就好笑嘞,如果喺立法會外大興土木,落地生根都唔違法,舊年就唔使大費周章清除佔領區喇,吓話?

斬草不除根,春風吹又生。政改表決在即,佔領鬧劇留低條大尾巴,更大嘅風暴仲喺後頭。港產官僚唔係唔明白呢個道理,佢哋之所以放軟手腳,都係因為欺軟怕硬啫。早排有劏房戶佔用工廠大廈,又唔見部門之間推莊?驅趕自食其力嘅小販,甚至將人逼落河浸死,又唔見執法部門手軟?港府由得班佔友打橫行,講到尾咪又係驚對方背後有人撐腰,投鼠忌器買佢哋怕囉。

所以話啫,香港自詡法治之區,其實只係得啖笑嘅咋。講到呢度,太一叮不期然諗起當年嘅九龍寨城,作為港英政府不敢管,英國政府不想管,中國政府不能管嘅「三不管地帶」,結果淪為罪案頻生嘅化外之地。估唔到呢一幕今日竟然重演,睇嚟香港「寨城化」嘅一日都為時不遠咯,叮!

第一手消息請下載on.cc東網iPhone/iPad/Android/Windows Phone Apps