前晚喺一個活動上見到名人鄧永鏘嘅愛女Victoria鄧愛嘉,佢仲喺自己設計嘅黃色羊旁拍照,佢話設計靈感係「鶴立雞群」。

鄧愛嘉設計嘅黃色羊,靈感嚟自「鶴立雞群」。

鄧愛嘉稱兩公婆都怕悶,周末會去郊遊。

舊年底同拍拖四年嘅英國律師男友Christopher Owen結婚嘅佢,笑言有啲唔習慣新婚生活,因為多咗啲責任感,好多嘢要處理。咁有冇畀人催生小朋友?佢就話:「爸爸冇催,話順其自然,不過媽媽催,佢話再等佢就冇力抱孫,依家都可以湊吓。但未得住,我想生猴B,唔想生羊B,因為猴同我老公生肖夾啲。老公就唔理呢啲嘢,佢話生就生,不過我顧呢啲小細節。其實生仔定女都冇乜所謂,女就有我啲靚衫着,仔就同老公踢波,我希望生兩、三個,到我老咗都有人照顧。」

雖然工作好忙,但Victoria仍堅持放工後親自下廚。佢笑言:「我鍾意煮飯,有時老公都會煮。佢依家冇乜讚我,但拍拖時有,依家佢覺得應得。婚後相處仍然覺得好新鮮,因為我同佢都怕悶,而周末就去郊外,佢係英國人鍾意戶外活動,上船、玩wakeboard,佢都係運動型。」

第一手消息請下載on.cc東網iPhone/iPad/Android/Windows Phone Apps