尋日喺「香港環境卓越大獎」頒獎禮上見到環境運動委員會主席、天文台前台長「黑英」林超英,佢同環境局局長「星星」黃錦星長期展開慳電惡鬥,大呻暫時只係喺「軍械競賽」中落後畀對方,即係個雪櫃唔夠星星家中嗰個咁慳電喎。

林超英為半度電都鬥餐飽。

同場的中華廠商聯合會副會長吳永嘉(左)同泉昌董事副總經理黃楚恒(右)各有環保心得。

劉伯輝話旗下餐廳多咗食客自備食物盒購買外賣。

星星早前自豪分享家中每月電費只需一百二十元,但黑英亦唔輸蝕,話說佢同太太本來每人每日只用兩度電,當時已係城中難得咁環保,點知後來殺出星星呢個對手,聲稱每日只用「一度半」電。黑英立即出盡法寶追趕佢,但由於家電之中最耗電嘅係冷氣機,所以唔係熱到爆,黑英都唔會開冷氣。

舊款雪櫃嘥電

其次嘥電嘅係雪櫃,黑英大爆唔夠星星咁慳電,係因為星星最近換咗部新雪櫃,係眾多一級能源標籤中最慳電嘅。而佢嗰部就舊款啲,梗係唔夠新機咁好啦,但黑英就寸爆星星,話換新雪櫃即係要製造垃圾,所以佢用得就繼續用先係最環保喎,估唔到半度電都可以鬥餐飽。

有關環境卓越大獎嘅評審準則,黑英就話環保一定要有系統持續進行,及有員工配合,笑言可準時收工嘅機構就係最環保,準時熄燈同電器,員工心情好啲,工作自然有效率好多。得獎機構銀龍集團行政總裁劉伯輝話,開心見到多咗住宅區嘅食客自備食物盒購買外賣,而佢哋每日晚飯餐單亦盡用當日食材,減少廚餘。

第一手消息請下載on.cc東網iPhone/iPad/Android/Windows Phone Apps