話說財爺「鬍鬚曾」曾俊華喺今年財政預算案提出引入歐美流行嘅美食車，以振興本港旅遊業。雖然計劃十畫都未有一撇，但立法會食物安全及環境衞生事務委員會已密謀去考察，委員會近日討論九月到美國紐約同三藩市進行職務訪問，了解當地美食車嘅經營模式同外國對進口食品嘅規管，預料訪問為期七日。

呢個建議正正係由委員會主席張宇人早前喺會議上提出，佢仲自爆自己有公司喺三藩市經營美食車，對當地情況相當了解，又建議去埋紐約，因為當地街道狹窄，似香港情況，加上美國唔同州有唔同法例，所以可以參考晒兩地嘅做法。秘書處於是對佢嘅建議諮詢委員會成員意見。

陳家洛大潑冷水

但泛民議員陳家洛大潑冷水，表明冇打算參加考察，仲話政府依家對美食車計劃都冇實質建議，到真係有建議書出嚟先考慮係咪需要去考察都唔遲。況且莫講話張宇人已有當地經營美食車嘅經驗，立會秘書處亦都有研究部門可以進行相關研究，故此陳家洛就質疑貿貿然為咗鬍鬚曾一句說話就去一轉美國，係嘥晒啲公帑。

其實咁啱撞正區議會選舉年，唔少議員都話不如把握暑假呢個黃金檔期落區拉票好過。唔使為區選惆悵嘅漁農界議員何俊賢，亦話對去美國考察嘅意欲唔高，覺得美國啲美食車咁大架，香港環境未必適合，不如參考台灣嗰啲，近近哋之餘仲可以睇埋當地嘅農業發展喎。似乎張宇人嘅建議並唔係好受議員支持，唔知佢去美國嘅願望會唔會落空呢？