經常見人對呢一輩嘅小朋友搖晒頭:唔捱得、唔受得批評、一蚊都未搵到就已經話要「上車」。無你份?恭喜你。睇到呢度就走?See,都話咗啲小朋友唔話得,仲駁嘴!最近碰到恒發洋參主席楊永仁,佢今年五十歲,忽然話要學英文。

楊永仁話年輕人唔好成日諗住一讀完書就要有樓。(資料圖片)

楊永仁係上市公司主席,做咗「洋參大王」好耐,時常要同外國人溝通合作,完全冇諗過佢英文會唔得。佢好坦白話自己學歷其實得小學程度,十三歲就出社會做嘢養家,賺到嘅就交畀董事長(即是佢媽媽)。佢又大讚內地地產大亨萬科主席王石,話王石年過六十都仲不斷進修,佢都以王石為榜樣。

睇吓,人哋貴為「洋參大王」好耐,都唔怕畀你知佢唔識英文,都仲肯出嚟講話自己都係由低捱出嚟。講到尾,都係想鼓勵吓啲後生。

講到上車,依家連工都未返嘅中學生都話要上車買樓。楊永仁就語重心長勸句,年輕人唔好成日諗住一讀完書就要有樓,因為讀完書唔會無啦啦有層樓,佢話希望年輕人先好好努力。咁佢又會留乜畀佢啲仔女?佢笑話唔使,話啲仔女自己都識搵錢。

第一手消息請下載on.cc東網iPhone/iPad/Android/Windows Phone Apps