香港近年興起成立地方省市社團總會或組織，表面上話係要聯絡鄉情，查實同有關方面為咗喺香港大大小小嘅選舉中發揮組織動員力不無關係。不過，香港有頭有臉嘅政商界人士數來數去得嗰幾個，要搵到啱心水嘅當地籍貫人士揸旗，一啲都唔容易。好似最近捲入將中學生撐政改影片擺上網，而被有關學校告侵犯私隱風波嘅廣西社團總會，其會長鄧清河同一眾高層都唔係廣西人，真係幾搞笑。

不過，呢個情況唔係廣西社團總會獨有，其他總會都有類似情況，事關呢類總會一向炒雜燴，只要同當地有些少淵源嘅人，例如當地政協委員同喺當地投資嘅外商都可以加入，而且唔少總會鍾意搵猛人掛榮譽頭銜，導致來來去去都係幾張眾人熟悉嘅面孔。其實廣西社團總會名譽會長就有唔少廣東人，包括廣東社團總會前主席王國強同立法會議員林健鋒，唔通有個「廣」就得？講到尾，其實都係一場畀面派對啫！

第一手消息請下載on.cc東網iPhone/iPad/Android/Windows Phone Apps